Vestland, Vestland

Hald av laurdagskvelden – for 19. september kl 18 blir det endeleg teater på scena i Kabuso igjen!

I det humoristiske teaterstykket Vestland, Vestland får du vita ein heil del om Sogn og Fjordane og Hordaland som du sikkert alltid har lurt på, og ein heil del som du ikkje visste at du lurte på.

Kva skjedde på Gulatinget?
Låg dei tyske keisarane med damene på S-laget?
Går det an å flørta i dalatrekk?
Er det trist når nabosvinet døyr?
Kva har skjedd og kor er vi på veg?
Kort sagt: Kven er vi?

Framsyninga er ei gåvepakke frå Teater Vestland og Det Vestnorske Teateret til alle innbyggarane i det nye fylket. Ei rekke påstandar, særpreg og historiske hendingar blir presenterte, gjenskapte, diskuterte og avklarte, slik at vi kan vandra vidare saman.

På scena står Claus Sellevoll frå Alversund i Nordhordland og Sigrid Moldestad frå Breim i Nordfjord. Finn Tokvam har skrive teksten og Arvid Ones har regi.

Vestland, Vestland er produsert av Teater Vestland og Det Vestnorske Teateret.

Arr: Teater Vestland, Det Vestnorske Teateret og Kabuso